Svilup regiunel
Standort- und Wirtschaftsförderung

Il svilup regiunel da la Regiun Malögia es gnieu creo per realiser la «nouva politica regiunela da la confederaziun e dal chantun Grischun  (NPR)». Incumbenza principela es la promoziun, la direcziun e l’accumpagnamaint da progets pel svilup regiunel, la coordinaziun cun las activiteds d’oters actuors locals sün quist sectur e la chüra dals contacts cun las regiuns limitrofas.

A vegnan sustgnieus progets chi haun il böt  da valuriser potenziels economics e cotres d’augmanter in maniera perdüraivla la cumpetitivited da las regiuns, da s-chaffir plazzas e da creer valur. Ils mezs da la NPR paun gnir druvos exclusivmaing pel scopo da svilupper l’economia. Il svilup regiunel da la Regiun Malögia s’occupa da l’Engiadin’Ota e da la Bergiaglia.

Situaziun da partenza

• s-chaffir üna survista dal svilup regiunel da fin uossa;
• identificher potenziels pel svilup futur e’ls güdicher in que chi reguarda lur realisabilited;
• definir accents principels per las imsüras politicas regiunelas.

Actualisaziun 2024

La strategia da svilup economic regiunel ho ün caracter a lungia vista, es però il medem mumaint ün palperi da lavur e sia validited stuvess perque gnir examineda cuntinuantamaing. Düraunt ils ultims quatter fin tschinch ans sun gnieus deliberos differents documaints da strategia importants illa regiun, documaints chi staun in connex direct cun la strategia da svilup economic regiunel (traunter oter il concept da spazi, il concept turistic cumplessiv, la strategia da perdüraivlezza), ultra da que ho que do üna restructuraziun dal turissem. Per quist motiv nu d’eira il cuntgnieu da la strategia da svilup economic regiunel pü consistent, ad es naschieu il bsögn da l’adatter als svilups regiunels dals ultims ans. Il cuntgnieu da la strategia es valabel eir in futur, perque s’ho que desistieu d’ün nouv process da strategia. Ad es gnida realiseda üna consultaziun publica chi s’ho referida be als cuntgnieus actualisos, ma brich a las direcziuns ed arcumandaziuns d’agir. La strategia da svilup economic regiunel es gnida appruveda da la conferenza dals presidents in occasiun da la tschanteda dals 6 marz  2025.