Il svilup regiunel da la Regiun Malögia es gnieu incumbenzo dals 12 cumüns traunter Bergiaglia fin S-chanf da svilupper üna strategia da dürabilited per la Regiun. Que cul böt da svilupper inavaunt la Regiun attractiva e degna da viver cun resguarder las dimensiuns da dürabilited. Quista strategia es gnida appruveda da la Conferenza dals presidents als 14 december 2023 ed es gnida deda libra scu arcumandaziun pels cumüns e parts invoutas da la Regiun.
Tenor las prognosas da perscruteders dal clima e scienzios sün tuot il muond s’intensiveschan las consequenzas dal müdamaint dal clima sün l’ambiaint, la societed e l’economia i’ls prossem decennis. La Confederaziun presüma cha’l müdamaint saro particulermaing resentibel illas regiuns alpinas. Per quist motiv vuless la Regiun Malögia garantir culla “Strategia da dürabilited” üna planisaziun ad ura d’imsüras e la realisaziun da quellas. Cun que dess d’üna vart gnir fat frunt al müdamaint dal clima in möd oriento a las pussibiliteds e da l’otra vart avair in mira ün svilup equilibro in tuottas trais dimensiuns da la dürabilited: economia, societed ed ambiaint. Schanzas dessan gnir ütilisedas ed ils conflicts d’interess confruntos in möd pro-activ.
La strategia da dürabilited stu gnir purteda insembel da la populaziun locala e dals cumüns. A la finela paun be gnir realisedas imsüras chi haun ün grand acconsentimaint. La cooperaziun da la glieud illa Regiun Malögia es perque üna part centrela pel svilup da la strategia da dürabilited. Confuormamaing esa gnieu do ün grand pais a la vusch da la populaziun tar l’elavuraziun da quista strategia. Per pudair illustrer quist purtret d’opiniuns vast, es gnieu fat principi 2023 üna retschercha online extaisa. Visiun, böts scu eir l’orientaziun as basan sün quists resultats.
Culla strategia da dürabilited dessan gnir identifichos potenziels tar las trais dimensiuns economia, societed ed ambiaint ed a dessan gnir mussedas sü orientaziuns importantas e champs d’acziun per l’intera Regiun Malögia.
L’intera strategia pel svilup dürabel scu eir resultats detaglios da la retschercha staun a disposiziun per telecharger.
Retschercha da strategia per ün svilup persistent
Il svilup regiunel da la Regiun Malögia es gnieu incumbenzo da las 12 vschinaunchas traunter Bergiaglia e S-chanf da svilupper üna strategia per ün svilup persistent per la regiun. Üna part considerabla da quistas lavurs da strategia sun las opiniuns e’ls püts da vista dals indigens e dals seguond-indigens scu eir dals giasts davart las dimensiuns da la persistenza. Per quist motiv s’ho que fat al cumanzamaint da l’an üna vasta retschercha online. Ils resultats sun uossa gnieus preschantos in occasiun da la conferenza dals presidents dals 27 avrigl 2023.