La planisaziun regiunela da las vschinaunchas da l’Engiadin’Ota e da la Bergiaglia es daspö ils 1. schner 2016 illa cumpetenza da la regiun Malögia.
Planisaziun regiunela
Ils plans directivs regiunels paun gnir consultos suot il seguaint link: planisaziun regiunela da la regiun Malögia
Proget territoriel da la regiun
Il proget territoriel da la regiun serva scu visiun cumplessiva surordineda per ün svilup territoriel persistent ed oriento vers il futur illa regiun e serva scu compass per sieu svilup territoriel.
Ils böts e las strategias dal proget territoriel fuorman üna basa centrela per l’elavuraziun dal plan directiv regiunel. Els dessan però eir gnir integros in otras planisaziuns ed oters concepts cumünels e regiunels.
L’elavuraziun da la strategia turistica regiunela e dal concept territoriel succedan in möd coordino ed armoniso in que chi reguarda il cuntgnieu. La strategia turistica regiunela fuorma la basa pel concept cumplessiv dal turissem regiunel (CCT), scu cha que vain pretais da la confederaziun per la coordinaziun territoriela da grands progets d’infrastructura turistica in üna destinaziun. Per garantir quista coordinaziun d’aspets territoriels dal concept cumplessiv dal turissem regiunel (CCT) cun las ulteriuras pretaisas territorielas illa regiun vegnan mussos ils cuntgnieus territoriels importants dal CCT i’l proget territoriel da la regiun. Ulteriurs temas dal CCT nu figüreschan i’l cuntgnieu dal proget territoriel da la regiun e vegnan elavuros in connex cun la strategia turistica regiunela.
Concept dal lö implaunts da sport
Per incumbenza da la conferenza dals presidents da la Regiun Malögia ho la cumischiun da planisaziun regiunela elavuro ün concept dal lö implaunts da sport chi serva scu basa per repasser il plan directiv regiunel sül sectur dals lös e dals intschess per implaunts da sport scu eir per las ulteriuras lavuors in que chi reguarda l’elavuraziun da planisaziun d’ün lö per ün center da sport sül glatsch. I’l ram d’üna exposiziun da cooperaziun publica haun persunas interessedas pudieu piglier pusiziun e cumpiler ün rapport da cooperaziun.
In occasiun da la tschanteda dals 30 schner 2020 ho la conferenza dals presidents appruvo il rapport da cooperaziun ed il concept dal lö implaunts da sport.
Management da l’ova
Las vschinaunchas da la Regiun Malögia haun do l’incumbenza dad elavurer üna survista da la situaziun da la spüerta d’ova e dal bsögn d’ova. Lotiers as trattaiva que da cumpiler üna survista da la cumposiziun da la spüerta d’ova ed in che sectuors chi vain druveda ova, in che quantited ed a che termin. Ultra da que dess gnir musso sü cu cha’l bilauntsch da l’ova as preschainta cumplessivmaing e düraunt il decuors da l’an. D’interess d’eira impustüt scha que do difficulteds cul provedimaint düraunt ils temps cun la spüerta d’ova la pü pitschna e, in cas da schi, che chi sun ils motivs. Ultra da que d’eira da respuonder la dumanda, scha e cu cha l’economia d’ova i’l territori cumpiglio da l’En e dal Flaz as müda tres differentas ütilisaziuns.