Zieva cha l’iniziativa per ün center regiunel da sport sül glatsch es gnida accepteda in favrer 2019 ho gieu lö l’evaluaziun dal lö per ün tel center. Quist’evaluaziun es gnida documenteda i’l concept regiunel per implaunts da sport e gnida suottamissa a la cooperaziun publica dal settember fin al november 2019. La conferenza dals presidents ho appruvo in occasiun da sia tschanteda dals 20 schner 2020 il concept regiunel per implaunts da sport cun l’evaluaziun da lös pussibels per ün center regiunel da sport sül glatsch. Ils duos lös San Murezzan Signal scu eir Samedan Promulins ost as cumprouvan scu ils lös ils pü adattos tenor quist concept.
In collavuraziun cun las duos vschinaunchas da staziunamaint es gnida examineda e cumpruveda la realisabilited dal punct da vista da fabrica d’in implaunt da sport als duos lös. Las duos vschinaunchas haun in seguit sclarieu la garanzia da la disponibilited e las ulteriuras cundiziuns da basa essenzielas per survgnir l’areal necessari.
In meg 2020 ho la vschinauncha da San Murezzan comunicho a la Regiun Malögia cha l’areal Signal stetta in princip a disposiziun per la planisaziun d’ün center regiunel da sport sül glatsch. Pel lö da Promulins ost ho la vschinauncha politica da Samedan fat trattativas davart ün acquist da terrain cun la comunited dals vschins scu proprietaria dal terrain da l’areal pretais. Al cumanzamaint d’october ho la vschinauncha da Samedan comunicho a la Regiun cha que nun hegia do üngüna cunvegna in que chi reguarda la disponibilited dal terrain, uschè cha il lö da Promulins ost nu sto pü a disposiziun per ün center da sport sül glatsch in quista fuorma. Pels ulteriurs sclarimaints per realiser ün center da sport sül glatsch illa fuorma previsa cun üna halla da glatsch, üna plazza da glatsch our i’l liber e cun üna surfatscha da curling cuvrida cun ün tet sto perque be auncha a disposiziun l’areal Signal.
In seguit sun gnidas approfundidas las cumprouvas da realisabilited da fin uossa, a s‘ho eruieu ils cuosts, sclarieu ils aspets generels da la gestiun e d’eventuelas fuormas da purteders. Quistas lavuors d’approfundimaint sun gnidas fattas in stretta collavuraziun cun la vschinauncha da San Murezzan. Ad es auncha da sclarir la dumanda, per che predsch da terrain cha l’areal vain miss a disposiziun a la Regiun. Fin cha que nu do üna resposta definitiva a quista dumanda nu po gnir fatta üngüna votaziun davart il proget illas vschinaunchas da la Regiun.