Incumbenzas

Svilup regiunel

Svilup regiunel regiun Malögia

Il svilup regiunel da la Regiun Malögia es gnieu creo per realiser la «nouva politica regiunela da la confederaziun e dal chantun Grischun  (NPR)». Incumbenza principela es la promoziun, la direcziun e l’accumpagnamaint da progets pel svilup regiunel, la coordinaziun cun las activiteds d’oters actuors locals sün quist sectur e la chüra dals contacts cun las regiuns limitrofas.

A vegnan sustgnieus progets chi haun il böt  da valuriser potenziels economics e cotres d’augmanter in maniera perdüraivla la cumpetitivited da las regiuns, da s-chaffir plazzas e da creer valur.

Ils mezs da la NPR paun gnir druvos exclusivmaing pel scopo da svilupper l’economia.

Il svilup regiunel da la Regiun Malögia s’occupa da l’Engiadin’Ota e da la Bergiaglia.


Strategia da svilup da la Regiun Malögia

Agenda 2030

L’an  2015 s’haun radunos püssas voutas rapreschantants da la politica e da l’economia da las vschinaunchas da l’Engiadin’Ota scu eir da las vschinaunchas da las duos valledas meridiunelas, sustgnieus da l’uffizi per economia e turissem (UET)  e’l secretariat da stedi per l’economia (SECO), per discuter las direcziuns da strategia giavüschedas da lur lös e las sfidas chi resultan in quist connex. Quist process es gnieu realiso cun consultaziun da l’uffizi  pel svilup dal territori dal chantun Grischun (UST). Cul process «Agenda 2030 Grischun» s’ho que pruvo da formuler strategias integrelas a basa da las fermezzas e deblezzas da las regiuns (territori funcziunel dal punct da vista socioeconomic).

Cotres dess gnir creo ün consens traunter las vschinaunchas da la regiun respectiva in vista a las sfidas ed imsüras dal svilup. Las cugnuschentschas da quist process sun gnidas integredas in üna strategia da svilup e sun gnidas transferidas in tuot ils instrumaints relevants (plan directiv regiunel, program da realisaziun NPR, ledscha pel svilup economic i’l chantun Grischun)  scu eir ütilisedas per üna megldra accordaziun cun las singulas politicas secturelas.  Ultra da que es resulto dal process «Agenda 2030 Grischun» per mincha regiun ün plan d’imsüras cun imsüras concepziunelas e progets concrets.

Actualisaziun da la strategia da svilup da la regiun

Üna revisiun parziela da la ledscha per promouver il svilup economic i’l chantun Grischun (LSE) preschanteda dal 2019 da la regenza e delibereda l’an 2020 dal Grand cussagl dal chantun Grischun, prevezza üna nouva concepziun dal management regiunel. Cò dessan eir dvanter pü importantas las strategias da svilup regiunelas: Ellas sun ün instrumaint directiv e da planisaziun chi serva al chantun eir scu orientaziun per la surdeda da mezs da promoziun sül sectur da la politica regiunela.  Progets da purteders da dret public vegnan dimena be promovieus, sch’els sun coordinos regiunelmaing e cumprais illas strategias da svilup regiunelas.

Scu consequenza da la revisiun da la LSE ed in vista a la perioda da NPR a partir dal 2024 sun da preschanter al chantun strategias da svilup actualisedas; la respunsabilited per l’ulteriur svilup es chosa da las regiuns ed il chantun piglia cugnuschentscha da que.

L’actualisaziun da las strategias da svilup regiunelas dal 2015 es gnida realiseda in üna procedura successiva chi ho garantieu la stretta coordinaziun cun las vschinaunchas scu eir la cooperaziun publica. Scu prüm sun gnidas examinedas las strategias da svilup regiunelas existentas e que ho do üna consultaziun interna tar las vschinaunchas.

Ils 16 lügl 2020 sun ils documaints elavuros gnieus preschantos a la conferenza dals presidents chi’ls ho appruvo unanimamaing per mauns d’üna cooperaziun publica. Zieva ün’ulteriura elavuraziun ho la conferenza dals presidents appruvo  ils documaints da strategia  in sia tschanteda dals 17 december 2020.